| 100 þúsund manns á bráðamóttökuna |
| Föstudagur, 09. Apríl 2010 12:04 |
 GERT er ráð fyrir því að um 100 þúsund manns, sem svarar til tæplega þriðjungs þjóðarinnar, komi á ári í sameinaða bráðamóttöku Landspítala í Fossvogi. Til þess að gera sameiningu tveggja stærstu bráðadeilda spítalans mögulega var byggt hús fyrir móttöku sjúklinga í Fossvogi og eldra húsnæðið endurbætt. Deildirnar sameinuðust í gær.
„Markmiðið er að einfalda aðkomu sjúklinga að sjúkrahúsinu, tryggja rétta móttöku þeirra og auka skilvirkni til að stytta biðtíma á bráðamóttöku. Þá er tilgangurinn að bæta aðstöðu fyrir sjúklinga sem ekki hefur verið vanþörf á og minnka kostnað,“ segir Guðlaug Rakel Guðjónsdóttir, framkvæmdastjóri bráðasviðs Landspítala. Tvískipt bráðadeild Bráðamóttökunni er ætlað að þjóna sjúklingum með bráð veikindi og slys. Allir sjúklingar koma um nýjan aðgang að bráðadeild G2 sem er í viðbyggingu við húsnæði gömlu slysadeildarinnar. Þar eru sjúklingar flokkaðir eftir því hversu alvarleg veikindin eru. Bráðadeildin er opin allan sólarhringinn. Þeim sem ekki þurfa þjónustu samstundis er vísað á bráða- og göngudeild á G3 á annarri hæð hússins en hún er lokuð á nóttunni. Endurkoman er einnig þar.Hjartaþræðingartæki LSH verður í hjartamiðstöð í húsnæði gömlu bráðamóttökunnar við Hringbraut. Guðlaug segir að þar verði dag- og göngudeildarþjónusta efld. Hjartamiðstöðin er lokuð um helgar. 
|