Landlæknisembættið hyggst á næstunni kanna ítarlega hvort álag á starfsmenn Landspítali hafi aukist frá því sem áður var og skila heilbrigðisráðherra greinargerð um málið. Álfheiður Ingadóttir, heilbrigðisráðherra, óskaði eftir því við landlæknisembættið að það kannaði sérstaklega hvort álag á starfsmenn Landspítala hafi aukist eins og Ungliðadeild sjúkraliða hélt fram, og ógnaði öryggi sjúklinga.

Greindi ráðherra sjúkraliðum frá viðbrögðum sínum við ályktun félagsins á fundi, sem hún átti með fulltrúum félagsins og ungliðadeild.

Heilbrigðisráðuneytið segir, að Anna Stefánsdóttir, framkvæmdastjóri hjúkrunar á Landspítala, hafi látið hafa eftir sér af þessu tilefni að spítalinn sé betur mannaður nú en undanfarin ár, sjúklingum sé sinnt meira en í nóvember í fyrra og fleiri séu starfandi á spítalanum.

Anna Stefánsdóttir segi m.a. í samtali við Morgunblaðið að fleiri hjúkrunarfræðingar og sjúkraliðar séu starfandi á bráðadeildum spítalans en undanfarin tvö ár og að samkvæmt könnun meðal starfsmanna telji þeir álag nú ekki vera þyngra en árið 2006.

www.mbl.is 21.12.2009