ASPERÍN gagnast helst karlpeningnum því nýjar rannsóknaniðurstöður benda til að verkjalyfið verndi karlmannshjartað í mun meira mæli en kvenmannshjartað. Sumar fyrri rannsóknir hafa bent til þess að lyfið geti dregið úr hjartaáfalli um allt að helming, en nú hafa kanadískir sérfræðingar við háskólann í Bresku-Kólumbíu sem sagt sýnt fram á kynjamun í þessu tilliti, að því er vefmiðill BBC greindi frá fyrir skömmu. Þeir telja að lyfið gagnist konum síður en körlum, en mæla gegn því að konur, sem eru að taka lyfið í kjölfar hjartaáfalls, hætti að taka það.