HAMINGJUÓSKUM og kossum rigndi yfir trúnaðarmenn skurð- og svæfingarhjúkrunarfræðinga í húsi Félags íslenskra hjúkrunarfræðinga á níunda tímanum í gærkvöldi eftir að ljóst varð að horfið yrði frá fyrirhuguðum breytingum á vaktafyrirkomulagi þeirra á Landspítala. Trúnaðarmönnunum var fagnað með dynjandi lófaklappi er þeir kynntu niðurstöðu funda með heilbrigðisráðherra og fulltrúum spítalans sem stóðu nær sleitulaust í allan gærdag, og augljóst að mönnum var létt, enda náð fram sínum markmiðum: Starfandi forstjórar Landspítala lýstu því yfir að það vinnufyrirkomulag sem öðlast átti gildi í dag, 1. maí, „er ekki til umræðu lengur“. Unnið verður nú að því í samráði allra aðila að gera vinnuskipulag í takt við vinnutilskipun ESB.

Gengið að öllum kröfum

Mikill meirihluti þeirra 96 hjúkrunarfræðinga, sem sagt höfðu upp störfum, dró því uppsagnir sínar til baka í gærkvöldi en um tugur þeirra stendur við uppsögn sína og hætti störfum á miðnætti.

www.mbli.is 01.05.2008