Breskur hjartalæknir fær nóg

Þriðjudagur, 19. Janúar 2010 00:00

smjr Breskur hjartalæknir hefur fengið nóg af aðgerðarleysi stjórnvalda og hefur lagt til að smjör verði bannað, líkt og fíkniefni. Hann segir að smjörbann myndi bjarga milljónum mannslífa.

Shyam Kolvekar, sem er afar virtur hjartalæknir við University College sjúkrahúsið í London, segir að ef fólk hætti að borða smjör og fengi sér þess í stað ólífuolíu, myndi ótímabærum dauðsföllum snarfækka.

Í Bretlandi borðar meðalmaðurinn 800 grömm af smjöri á mánuði sem er fimmtungi yfir ráðlögðum skammti.

Kolvekar segir að með því að banna smjör og nota heilbrigðara viðbit myndi minnka fituinntöku líkamans um átta grömm á hverjum degi.

„Þetta myndi bjarga þúsundum mannslífa í Bretlandi á hverju ári og forða fólki frá ýmsum fylgikvillum æðasjúkdóma. Það er afar ergilegt að oft hefði verið hægt að koma í veg fyrir heimsókn til hjartaskurðlæknis ef fólk hefði aðeins neytt heilbrigðara viðbits.“

Rannsóknir sýna að þeir sem þurfa hjarta- og æðakerfisaðgerðir verði æ yngri og segir Kolvekar að eingöngu það að skipta um viðbit gæti gerbreytt þeirri stöðu.

Talsmaður Jamie Oliver, meistarakokksins, segir að Oliver sé andvígur smjörbanni.

„Jamie Oliver er andvígur matarlögreglu og boðum og bönnum í matargerð. Það er hægt að neyta smjörs í hófi.“

www.pressan.is 19.01.2009