Áströlsk stúlka skipti skyndilega um blóðflokk eftir að hafa fengið lifrarígræðslu og segja læknar hennar að þetta sé í fyrsta skipti sem slíkt gerist er sjúklingur fær líffæragjöf. 

Demi-Lee Brennan var níu ára gömul er hún veiktist alvarlega eftir að lifur hennar hætti að starfa. Fékk hún nýja lifur og níu mánuðum síðar kom í ljós að hún var ekki lengur í sama blóðflokki og áður heldur í þeim blóðflokki sem lifrargjafinn var í.  

Að sögn Michael Stormon, læknis stúlkunnar, sem er orðin 15 ára, er hún heil heilsu en enn í þeim blóðflokki sem lifrargjafinn var í er hún fékk lifrina frá fyrir sex árum síðan. Að sögn Stormon er ekki vitað til að slík blóðflokkaskipti hafi áður átt sér stað við lifrarígræðslu. Fjallað er um þetta í bandaríska læknatímaritinu New England Journal of Medicine sem kemur út í dag.

www.mbl.is 24.01.2008