„Ég er allur að braggast“

Fimmtudagur, 12. Maí 2011 08:52

„Ég er allur að braggast og vonast til að losna um helgina,“ sagði sjónvarpsmaðurinn Helgi Seljan sem gekkst undir hjartaþræðingu á dögunum, í samtali við DV á mánudaginn. Hann sagðist vera búinn að dvelja á hjartadeildinni í viku en sjá nú fyrir endann á dvöl sinni þar. Helgi hafði fundið fyrir verkjum fyrir brjósti og var jafnvel talið að um kransæðastíflu væri að ræða. Svo var þó ekki, heldur reyndist sársaukinn stafa af bólgum í hjartavöðvanum. Gísli Jónsson, hjartalæknir í Domus Medica, segir að þegar bólgur myndist í hjartavöðva breytist hjartarafritið gjarnan. „Þegar um slíkar breytingar er að ræða getur það villt um fyrir læknum. Þetta er ein aðalmismunagreingin við bráða kransæðastíflu þannig að þetta fólk þarf stundum að fara í kransæðaþræðingu til að hafa vaðið fyrir neðan sig,“ segir Gísli aðspurður hvort algengt sé að þeir sem fái bólgur í hjartavöðva þurfi á hjartaþræðingu að halda. www.dv.is 12.05.2011