Guðlaugur Þór Þórðarson heilbrigðisráðherra fól í gærkvöld forstjóra Landspítala að hefja undirbúning að því að styrkja og undirbúa geðsvið spítalans þannig að það geti sem best þjónað þeim einstaklingum sem þurfa aðstoð til að takast á við erfiðleika sem upp koma vegna núverandi aðstæðna á fjármálamarkaði. Þetta kemur fram í fréttatilkynningu frá heilbrigðisráðuneytinu.

Undirbúingur af hálfu forstjóra er þegar hafinn.

Þá hefur heilbrigðisráðherra falið forstjóra og lækningaforstjóra Heilsugæslu höfuðborgarsvæðisins að koma á fót bráðaþjónustu, eða samsvarandi úrræðum, sem aðstoðar fólk sem á í tímabundnum erfiðleikum vegna umrótsins sem nú ríður yfir.

Fram kemur í tilkynningunni að ráðherra telji ljóst að mjög muni reyna á heilbrigðisþjónustuna, sem eina veigamestu grunneiningu samfélagsins, á næstunni en að hilbrigðistarfsmenn séu þrautþjálfaðir og afar færir til að leiðbeina og hjálpa þeim einstaklingum sem séu hjálparþurfi.

www.mbl.is 07.10.2008