Miðaldra bindindismenn geta dregið hratt úr hættunni á að fá hjartaáfall með því að fá sér víndreitil á degi hverjum, segja bandarískir vísindamenn. Þeir sem byrja áfengisneyslu eru 38% ólíklegri til að fá hjartasjúkdóm en þeir sem hafna áfengi alveg.

Þetta er niðurstaða fjögurra ára rannsóknar sem 7.500 manns tóku þátt í. Allir voru bindindismenn við upphaf rannsóknarinnar, en sex af hundraði fóru að neyta áfengis í hófi, eins eða tveggja drykkja á dag, á meðan rannsóknin stóð.

Þeir sem einungis neyttu léttvíns fengu mesta heilsubót, segir í niðurstöðunum, sem birtust í American Medical Journal. Hjartalæknar vilja þó taka fram að áfengi sé ekki allsherjarheilsubót.

www.mbl.is 08.03.2008