Ögmundur Jónasson, nýr heilbrigðisráðherra, hefur tekið ákvörðun um að afnema innritunargjöld á sjúkrahús en reglugerð þar um tók gildi um áramótin. Að sögn heilbrigðisráðherra verður ný reglugerð birt á næstu dögum.

Samkvæmt reglugerðinni, sem tók gildi um áramótin, var tekið upp 6000 króna gjald vegna  innlagnar á sjúkrahús, þó ekki vegna innlagnar á fæðingardeild. Gjaldið fyrir elli- og örorkulífeyrisþega var þrjú þúsund krónur en börn yngri en 18 ára greiða ekkert.

„Þetta er í samræmi við þá gagnrýni sem við höfum haldið uppi í vetur, nefnilega að þarna sé um að ræða gjöld sem séu með öllu óviðunandi,“ segir Ögmundur.

Hann kveðst jafnframt vera að skoða nýboðaðar skipulagsbreytingar í heilbrigðiskerfinu. Þá ætlar Ögmundur að hitta bæjarstjórann í Hafnarfirði í vikunni vegna boðaðra breytinga á St. Jósefsspítala og einnig þá sem tengjast starfseminni þar.

www.mbl.is 02.02.2009