Íslensk fyrirtæki geta vel tekið þátt í forvali fyrir hönnun nýs Landspítala að mati formanns verkefnisstjórnar. Skilyrði um starfsmannafjölda standi ekki í vegi fyrir því.

Í forvalsgögnum er þess krafist að þeir hópar sem taki þátt útnefni eitt fyrirtæki sem ábyrgðaraðila. Og sá þarf að hafa 30 háskólamenntaða starfsmenn. Sigríður Magnúsdóttir, formaður Arkitektafélags Íslands, sagði í hádegisfréttum okkar að engin íslensk arkitektastofa væri svona stór og því komið í veg fyrir að þær geti verið ábyrgðaraðilar. Gunnar Svavarsson, formaður verkefnisstjórnar, segir þetta ekki rétt. Fyrirtæki sem saman myndi teymi geti stofnað sameiginlegt fyrirtæki um verkefnið og það uppfylli þá skilyrðin. Þetta hafi verið gert undanfarin ár.

Arkitektastofur hafa þurft að draga verulega saman í kreppunni og margir vonast til að bygging nýs Landspítala bæti úr atvinnuástandi hjá arkitektum. Verkefnið verður boðið út á Evrópska efnahagssvæðinu eins og lög gera ráð fyrir.

www.ruv.is 28.12.2009