Þeir sem vilja grennast ættu að gleypa nokkrar lýsisperlur eftir að þeir eru búnir í líkamsræktinni, ef marka má frumniðurstöður ástralskra vísindamanna sem komust að því að sambland af líkamsrækt og lýsi minnkaði líkamsfitu, og hafði jákvæð áhrif á kólesterólmagn og æðastarfsemi.

Magn af góðu kólesteróli (HDL) jókst hjá þeim þátttakendum í rannsókninni er tóku einungis lýsi eða stunduðu líkamsrækt og tóku einnig lýsi, og svonefnd þríglyseríð (óheilsusamleg blóðfita) minnkuðu einnig. Um leið minnkaði líkamsfita þessara þátttakenda.

Það voru vísindamenn við University of South Australia í Adelaide sem gerðu rannsóknina, en niðurstöður hennar birtast í American Journal of Clinical Nutrition.