Biðlistar eftir hjartaþræðingum hafa styst mikið frá því á sama tíma í fyrra. Nú eru 43 manns að bíða, en á sama tíma í fyrra voru 123 einstaklingar á biðlista eftir slíkri aðgerð. Þetta kemur fram í samantekt landlæknis á biðlistum eftir aðgerðum. Þar segir að biðlistar hafi einkum verið viðvarandi eftir hjartaþræðingum, liðskiptaaðgerðum og aðgerðum á augasteini. Biðtími eftir öðrum aðgerðum sé hins vegar viðunandi. Til dæmis sé enginn biðlisti fyrir almennar skurðaðgerðir, svo sem gallsteina- og kviðslitsaðgerðir.

Það hlýtur að vera mikið gleðiefni þeirra sem bíða eftir hjartaþræðingu að virkilega sjái til lands í þeim efnum og er það mikil breyting frá fyrri árum. Ekki er vafi á því að nýtt hjartaþræðingatæki LSH sem tekið var í notkun í byrjun nóvember á þarna hlut að máli.
Það hafa verið höfðinglegar gjafirnar sem komið hafa frá einkaaðilum til að tækjavæða hjartaþræðingadeild LSH á liðnum árum. Ekki ber síður að nefna það framlag sem Landsamtök hjartasjúklinga hafa lagt fram og ætla að leggja til varðandi þessa nýjustu viðbót í öryggisneti hjartasjúklinga.

Landsamtök hjartasjúklinga Hjartaheill varð 25 ára á síðastliðnu hausti og var stefnt að því að söfnunarátak félagsins Þjóðarátakið hjartans mál til söfnunar fyrir nýja hjartaþræðingatækinu og fylgibúnaðar myndi ná hámarki í október síðastliðnum.
Eins og alþjóð veit þá hrundi samfélag okkar nánast til grunna í bankahruninu og öll plön sem fólk og félagasamtök höfðu haft á sínum prjónum urðu nánast að engu.

Því er það afar gleðilegt að síðastliðinn sunnudag 1. mars var Þjóðarátaki Hjartaheilla ýtt úr vör öðru sinni og vonandi eru aðstæður með þeim hætti að hægt verði að safna öllum þeim fjármunum sem áætlað var að safna síðastliðið haust.
Þjóðarátakátak Hjartaheilla kemur til með að ná hámarki með þriggja klukkustunda skemmti- og söfnunardagskrá á stöð2 þann 28. mars í opinni dagskrá.  Hvet ég alla sem tök hafa á að styðja við málefnið.
Höfum í huga að hjarta og æðasjúkdómar eru algengasta dánarorsök karla og kvenna á Íslandi en fleiri deyja úr hjarta og æðasjúkdómum en öllum krabbameinunum samanlagt bæði hjá konum og körlum.

Það er því er afar brýnt að vel takist til við þjóðarátak Hjartaheilla.

Reykjavík 07.03.2009

Björn