Stjórn Félags ungra lækna fordæmir þær breytingar sem gerðar hafa verið á fyrirkomulagi neyðarbílsins en ákveðið hefur verið að leggja niður störf lækna um borð í bílnum í sparnaðarskyni. Bráðatæknar munu eftirleiðis vera einir um borð í bílnum.

Í yfirlýsingunni er sagt ljóst að bráðatæknir með átta mánaða þjálfun komi ekki í stað reynds læknis og „því er ákvörðunin varla byggð á faglegum forsendum," segir í yfirlýsingunni.

„Því fordæmir stjórn Félags ungra lækna þessa ákvörðun og telur hana aðför að öryggi og velferð þeirra sjúklinga sem eru hvað veikastir á höfuðborgarsvæðinu en neyðarbíllinn hefur sinnt útköllum þar sem líf sjúklinga er talið liggja við s.s. í alvarlegum slysum, hjartastoppum og bráðum veikindum."

Þá er því bætt við að unglæknarnir álíti að stjórnendur Landspítala ættu að huga að „öðrum sparnaðarleiðum, sé þeirra þörf, sem ekki fela í sér skerðingu á þjónustu við bráðveika sjúklinga."

www.visir.is 13.12.2007